來自巴黎的法式薄餅 @ Cafe Crepes

我很喜歡 French Crepes，尤其是鹹薄餅，起初只為好奇心，後來真心愛上了，因為鹹甜的混合是最美妙的！

位於鏞記正對面的 Cafe Crepes ，帶來了巴黎祕方的薄餅，食落覺得真係幾香滑。

地舖刻意開個大窗，路過可見開放式廚房，見到法藉女廚師在不停整餅，令人垂涎！

除了鹹甜法式薄餅之外，早餐、意粉、法包、芝士及凍肉拼盤皆有幾款。

Crepe Francais $159

鴨腿薄餅，初初聽起上來以為是中西混合的 fusion，有點擔心唔知得唔得，後來想起，油封鴨腿本是法國菜，並無不協調問題。

造型幾特別，整只鴨腿與炒洋蔥放在頂，平日見慣雪糕生果，份外覺得有趣！

鴨腿因為肉厚，中心部分有點味寡，但配上味道濃郁的洋蔥同吃，口感大大提升，非常合拍。

薄餅中含有鴨肉及芝士餡料，份量充足，微甜的香滑薄餅與滋味的鴨肉組合，層次變化，非常美味，真心推薦，招牌油封鴨腿必要試。

加 $55 可以配個有湯或沙律及咖啡茶的套餐，幾化算。

Pan Bagnat $88

香煎吞拿魚、烚蛋配火箭菜，香軟滑與爽口的對比組合，法包新鮮且香脆，再配合酸甜醬汁，十分滿意的健康組合。

Pear & Salted Caramel $85

外貌似剛才的鴨腿薄餅，甜吃的 topping 是沾了鹽味焦糖的梨肉，內層都有料，清甜味美有水準，就是個香滑餅皮最好。

油封鴨腿，平日在餐廳點菜都唔平，現在以薄餅形食到，已經賺咗，所以雖然百幾蚊一份，都是值的。

人均消費:$220

嚐味日期: 20180918

評分：

味道：4.0/5

環境：3.5/5

服務：3.5/5

衛生：3.5/5

抵食：3.5/5

餐廳資料：

Cafe Crepes

中環威靈頓街15B號地舖

G/F, 15B Wellington Street, Central

29071888

別忘 like 我的 page, 感謝支持！

Facebook: IE食神俠侶

https://www.facebook.com/gourmetivy/

Openrice: IE食神俠侶

https://www.openrice.com/zh/gourmet/userdetail.htm?userid=113704

Instagram: gourmet_ivy

自煮鮑魚菜式輕鬆做

幾個月前去過富豪酒家食飯，證實阿翁鮑魚確實美味，（有興趣可看我的舊文: 阿翁鮑魚真係得 ），今次去試佢嘅罐頭鮑魚，原來一樣咁好。

人家的罐頭鮑魚只是原材料，阿翁的郤是成品，靈魂在罐內的鮑魚汁，真正鮑魚熬出來的精華，製造過程中混合鮑魚粉，並非只是蠔油扣芡汁咁大路，因此開罐之後無需再加工炆煮，即作冷盤、煮鵝掌、炆雞及撈麵都得。

因為有上乘的鮑魚汁，罐頭鮑魚的質素亦大大提升，吃到有幾成乾鮑獨特的韌力，尤其做到有乾鮑的鮑魚香味，濃郁香醇。

阿翁罐頭鮑魚用的是日本吉品的鮑苗，青島繁殖，台灣加工入罐，鮑魚及鮑汁分開煮，質素高，高檔貨，$520/罐，值唔值？視乎你嘅要求。

翁生熱情招待，大家同枱一起品嚐他構思的五款罐頭鮑魚菜式，並加以解說。

翡翠罐頭鮑片冷

罐頭鮑魚取出切片冷吃，伴西蘭花，就是這樣簡單，很見得人的冷盤。

罐頭鮑魚鵝掌

這晚吃到的多款菜式之中，最欣賞鮑魚鵝掌，炆得實在腍嫩入味，感覺輕奢滿足，相比上次吃真正吉品，自然少了那溏心，但鮑汁味道及鵝掌質素相同，家宴請客，不費吹灰之力，但卻非常有體面。

玉樹麒麟罐頭鮑甫

這一道最有創意，金華玉樹雞食得多，配鮑魚做真係未試過，食落很夾，鮑甫相比雞肉更有嚼勁，提升口感，做出來請屋企人食，相信同樣會帶給他們驚喜。

砂鍋罐頭鮑魚炆雞煲

雞件炆至非常惹味，鮑魚上沾有焦香，只需用上砂鍋煲，相信亦不難做，話說過來今晚的雞很有質素，件件香滑完全唔嚡口，呢方面我唔敢擔保自己做得有冇大廚咁好！

蒜子上湯浸莧菜

健康主義，食鮑魚菜式都要配個菜，新鮮煮得腍就是好。

鮑魚汁撈稻庭麵

最後罐頭剩餘的鮑汁仲可以直接撈落稻庭麵食，稻庭麵非常掛住，真是個好煮意。

龜苓膏

意料之外，甜品竟然是龜苓膏，而且超足料，雖然時間末夠比較水多了點，但藥材味十足，正好調理外吃得多的熱毒。

美點雙輝

咸水角很好吃，估計富豪點心都會唔錯，等我找天試吓。

全部菜式都好易做咁，喺屋企都可以輕鬆做大廚呀！

臨走前見到單張介紹，除咗罐頭鮑魚之外，仲有罐頭鵝掌、柚皮等，相當吸引。

嚐味日期: 20180921

評分：

味道：4.0/5

環境：4.0/5

服務：4.0/5

衛生：4.0/5

抵食：3.5/5

餐廳資料：

阿翁罐頭鮑魚

$520@

別忘 like 我的 page, 感謝支持！

Facebook: IE食神俠侶

https://www.facebook.com/gourmetivy/

Openrice: IE食神俠侶

https://www.openrice.com/zh/gourmet/userdetail.htm?userid=113704

Instagram: gourmet_ivy

城中聚腳新去處 @ The Town

人來人往的中環區，有無地方可以輕鬆吓、不限時、靜靜地食飯或者只係飲杯嘢，選擇唔算多，幸好近排多咗間。

大家仲記得名震一時的 Kee Club 嗎？這個位於鏞記大廈六七樓的名人聚點於去年初早已功成身退，近月換上了新主人。

The Town 同樣以高級會所形式經營，但並不距人千里，三合一的概念，酒坊、酒吧加餐廳，歡迎任何人光顧。

經過6樓的迎賓處，右方先遇上 Wine Buff 海悦酒坊，經營了名酒貿易及零售廿年，酒藏超過千款，尤其與法國 Bordeaux 區的高級酒莊關係良好，名酒專家在此，唔會揀唔到平靚正好酒！

再向前行就是酒吧，舒適的梳化座椅，空間感足，傾計唔怕嘈。

設置巨大電視螢幕，可以舒舒服服、齊齊睇波真不錯。

無需多講的，酒吧自然有各款雞尾酒、紅白酒及烈酒選擇，特別之處在於二合一概念，若然在 Wine Buff 買了酒，可以無需 corkage，即時在酒吧享用，以零售價錢買酒、然後在酒吧享用，絕對諗得過！

雞尾酒款全部經過精心調製，名字也特別，在 The Town 自然必先試一杯 The Town。

The Town $138

意想不到，如花一般的漂亮！粉紅泡沫、食用花及拉花，真花上心思！放在冰塊上保冷，確保冰涼可口，專貴會所服務！

入口充滿果甜，新鮮野莓、菠蘿及青檸汁的混調，面頭蛋白泡泡添順滑，rum 酒份量輕描淡寫，可口味美！

用餐區在7樓，餐廳內有樓梯直上，傳統雅緻的裝潢。

晚上供應西式套餐，每位$888/$1388，但若然會員預先要求，中午的亞洲菜式亦可有，例如海南雞飯、肉骨茶，好似家廚咁，要食乜嘢都得！既然可以咁樣揀，今晚我們決定中西混合，

新鮮麵包兩款選擇，全麥包或番茄包，我選擇了蕃茄包，不過不失。

Chateau Larcis Ducasse 2003

2003 是個好年份，儲藏了十五年剛好是開酒的理想時段，酒香樸鼻，無論嗅覺或味蕾皆感到濃郁的果香，body 及 tannins 都頗厚。

好奇 Google 吓，見平均價售 $583，Wine Buff 賣$498，酒坊買了上來飲同樣免開瓶費，絕對是開心價。

阿拉斯加蟹肉配蕃茄奶凍

擺盆別緻漂亮，中央的阿拉斯加蟹肉非常新鮮，還要加上粒粒蟹子增口感，頂端插入一片薄脆火腿添鹹香，富層次的鮮甜口味。

車厘茄子釀入比一般硬的 panna cotta 奶凍，酸甜滑溜得來實在；還有兩件芒果蕃茄做的 jello，香滑討好。

乳鴿

看似中式燒乳鴿，分別在配上法式醬汁及賣相，特別之處在嚴選BB鴿，皮薄肉嫩骨都軟，味道豐富。

鰻魚汁燒三文魚

特色就在鰻魚汁，濃郁甜美的味道，原來配三文魚亦得，真是非常香嫩滋味！

肉骨茶

今晚肉骨茶，並非藥材滿瀉的馬來西亞風格，而是白色的星加坡口味。

賣相高貴，大大件肉骨，兩款醬汁配料，仲有油炸鬼，但胡椒味不算濃郁，未能滿足！

海南雞飯 

非常精緻的海南雞飯，每一項目皆有心思，包括必備的三款醬汁，老火湯及油飯，就是酸蘿蔔亦切成九格方粒。

特別選用細細隻的雞確保雞肉嫩滑，油飯用雞湯浸，沒有加雞油所以不油膩，酸蘿蔔酸甜合度。

可以說是吃過中數一數二的好，中午套餐 $180，包括咖啡或茶。

海鮮叻沙

真的足本，龍蝦、大蜆、中蝦、班塊及豆卜，堂前倒湯，確保海鮮不久浸失分。

額外香料及摻摻粉麵配的做法正宗，椰奶香，味道濃郁，亦不俗。

Crepe Suzette 

現在這種堂前明火的煮法已經很少餐廳願意做，費時亦有些危險，難得的傳統。

依然很有娛樂性，Cointreau、Grand Merrier 、橙皮、橙肉、牛油、糖、薄餅漿，看似容易總需技巧。

配雪糕，理想不過！

星級環境與服務配合，尊貴會所內佳餚美酒，何等寫意！又係嗰句，這才是生活！

嚐味日期: 20180906

評分：

味道：4.0/5

環境：4.0/5

服務：4.5/5

衛生：4.0/5

抵食：3.5/5

餐廳資料：

The Town

中環威靈頓街32-40號鏞記大廈6-7樓

6-7/F, Yung Kee Building, 32-40 Wellington Street, Central

21579999

別忘 like 我的 page, 感謝支持！

Facebook: IE食神俠侶

https://www.facebook.com/gourmetivy/

Openrice: IE食神俠侶

https://www.openrice.com/zh/gourmet/userdetail.htm?userid=113704

Instagram: gourmet_ivy