現代廚師真多才，既有創意亦富文采，今晚吃到有趣的 fusion 菜色，亦嚐到懷舊手藝，最有趣就是菜名，新菜式等於廚師的新生兒，當然要為親生仔改個好名，江畔如月拍黃瓜、芙蓉百花燕液滾龍珠、渚煙露華濃台山蟹砵、嬌艷鮮茄老蛋煎腸粉，係唔係聽到已經好想食？
前菜三道豐味，包括明爐燒汁黑豚叉燒、江畔如月拍黃瓜及紫蘇蒜醋牛油果。
黑豚肉做的叉燒唔會唔好食，拍黃瓜菜名字有詩意，創意方面我最欣賞紫蘇蒜醋牛油果，開頭有啲擔心，加咗中式醬汁嘅水果味道會唔會好怪，原來食落只係酸酸地，份量拿得準，輕輕的令菜式更醒胃，完全沒有蓋過牛油果濃郁兼獨特的口感，有趣無問題！
俗語有話，唔怕生壞名最怕改壞名，呢道嬌艷鮮茄老蛋煎腸粉正好相反，鮮茄炒蛋並非特別又唔係矜貴，用來炒腸粉雖然有啲唸頭，但個名先至最盞鬼，嬌艷配老蛋，老來嬌麼！
其實老蛋只不過是炒熟蛋的意思，廚師真有幽默感！味道方面不只不老，腸粉非常嫩滑，相信是自己製造，因為絕對並非一般坊間買到的厚實，想不到番茄蛋炒腸粉是這麼夾，真係幾好食，真開心，住家早餐又有新款式，即時決定找日在家自己做。
今晚的懷舊菜之最，非渚煙露華濃台山蟹砵莫屬，台山蟹砵少人做，也許工序繁複。
蒸熟了的肉蟹看來栩栩如生，特別之處在加進黑豆增口感，可能因為咁可以少用肉，因為唔係太覺得吃到豬肉；蛋香及蟹肉的鮮甜完全融合，愈食愈香。
香露頭抽爆炒大英鯧魚球亦是懷舊工夫菜，擺盤型格，炸得香酥不膩，魚肉保持肉汁，水準不俗。
講到最靚嘅菜式，芙蓉百花燕液滾龍珠實至名歸。
燕液蝦球配透明濃湯啫喱配蒸蛋，賣相晶瑩矜貴，淡淡蝦肉，高湯滑蛋，很滋味。
手撕雞吃過，原來從前叫早走撕而非手撕，這道懷舊骨香走撕雞同樣夠派頭，酥香肉嫩。
與一般的黑蒜湯做法不同，養生黑蒜燉肉汁內有整件肉餅，黑蒜、陳皮與豬肉一同被剁成肉餅然後燉，怪不得肉香四溢，而黑蒜之酸香只在回甘味中淺嚐。
最滋味的是這道家傳紅糟蒜香鎮江骨，鬆軟入味，酸甜辛香，調味掌握得非常好。
大魚大肉之後配個青菜，漁家濃湯肉碎鮮腐竹浸番薯葉，有湯有菜更易入口，奶白湯頭內更有滑溜的腐皮，十分順口，但今日的番薯苗並非完全腍嫩，帶一點粗野感。
甜點鴛鴦配，送上蛋白撞雪燕杏仁茶拼香煎倫教白糖糕，稱心滿意的選擇。
今晚的聚會，吃了十一道菜，新派懷舊粵菜的創作皆有心思，水準不錯，酒店餐廳環境舒適，服務殷勤，價錢合理，最好玩就是菜名，不妨細意讀讀，有點意思！
嚐味日期: 20180703
評分：
味道：3.5/5
環境：3.5/5
服務：3.5/5
衛生：3.5/5
抵食：3.5/5
餐廳資料：
玉庭 Jade Pavillion
沙田白鶴汀街8號帝都酒店2樓
2/F, Royal Park Hotel, 8 Pak Hok Ting Street, Sha Tin
26943939
別忘 like 我的 page, 感謝支持！
Facebook: IE食神俠侶
https://www.facebook.com/gourmetivy/
Openrice: IE食神俠侶
https://www.openrice.com/zh/gourmet/userdetail.htm?userid=113704
Instagram:
gourmet_ivy
沒有留言:
張貼留言